Forseti Djíbútí með flesta fylgdarmenn í fyrra

Umfangsmesta heimsókn einstaks fyrirmennis fyrir lögreglu hingað til lands á síðasta ári reyndist heimsókn forseta Djíbútís, Ismails Omars Guelleh, í janúar á síðasta ári. Þetta kemur fram í ársskýrslu Ríkislögreglustjóra sem birt var í dag. Alls voru 27 manns í fylgdarliði forsetans, rúmlega helmingi fleiri en í heimsókn Jóhannesar Eidesgaards, lögmanns Færeyja, sem einnig kom í heimsókn í janúar.

Lögreglan á höfuðborgarsvæðinu annaðist auk þess umferðarfylgd þegar 28 sendiherrar erlendra ríkja afhentu forseta Íslands trúnaðarbréf sín á Bessastöðum. Auk þess sá lögreglan á Suðurnesjum um sérstaka öryggisgæslu á meðan sex þjóðhöfðingjar og ráðherrar höfðu skamma viðdvöl í Flugstöð Leifs Eiríkssonar.