Tilraunakennt popp

Sin Fang Bous, öðru nafni Sindri Már Sigfússon, úr hljómsveitinni Seabear, gefur í dag út sína fyrstu plötu sem nefnist Clangour. Upptökur stóðu yfir með hléum í um það bil eitt ár. „Þetta var allt tekið upp í hálfgerðum lotum inni á milli annarra verkefna. Mestur tíminn fór í eftirvinnslu og klippingar og þannig. Ég tók líka upp rosalega marga söngva fyrir flest lögin,“ segir Sindri. Hann játar að platan sé tilraunakennd, en það segi þó ekki alla söguna. „Hún er hálfgert popp í grunninn. Það er mikið af lögum sem eru ólík hvert öðru.“

Bæði Seabear og Sin Fang Bous eru á útgáfusamningi hjá þýska fyrirtækinu Morr Music. „Ég nefndi þetta við eigandann þegar við vorum á fundi. Svo sendi ég honum þetta og þeir vildu endilega gefa þetta út, sem er mjög fínt.“

Engir útgáfutónleikar eru fyrirhugaðir hérlendis á árinu en á næsta ári hefur Sindri sett stefnuna á tónleikahald erlendis. - fb