Spilla Fylkismenn titilvonum FH eins og 1989?

Fyrir lokaumferðina í Íslandsmótinu sumarið 1989 var FH á toppi deildarinnar með eins stigs forystu á KA. FH-ingar þurftu aðeins að vinna sigur á Fylki í lokaumferðinni til að verða Íslandsmeistarar.

Guðmundur Valur Sigurðsson kom FH-ingum yfir strax í upphafi leiks og virtust Hafnfirðingar vera í kjörstöðu. En Örn Valdimarsson jafnaði fljótlega fyrir metin og á 79. mínútu kom ein sárasta stund í sögu FH.

Hinn sautján ára gamli Kristinn Tómasson var nýkominn inn á sem varamaður. Hann fékk boltann á vítateigslínunni og sneri bakinu í markið. Skyndilega lyfti hann boltanum yfir sig og um leið varnarmenn FH. Hann stakk sér inn í vítateiginn og gerði út um titilvonir FH með stórglæsilegu marki. Marki sem síðar var valið mark tímabilsins.

Á sama tíma var KA að spila í Keflavík þar sem liðið vann góðan 2-0 sigur. Þar með var fyrsti og eini Íslandsmeistaratitill KA tryggður.

Sigurinn dugði reyndar Fylkismönnum ekki og féllu þeir á lakari markatölu en Víkingur.

Á morgun fer lokaumferðin fram í Landsbankadeild karla. Og nú, rétt eins og fyrir nítján árum síðan, eru Fylkismenn í þeirri stöðu að geta mögulega spillt titilvonum FH-inga á ný.

FH-ingar eru þó ekki í sömu stöðu nú og þá. Þeir eru tveimur stigum á eftir toppliðinu (rétt eins og KA forðum daga), Keflavík. Keflavík þarf að allra helst að vinna Fram á heimavelli til að gulltryggja titilinn.

Ef Keflavík gerir jafntefli dugar FH tveggja marka sigur gegn Fylkismönnum. Ef Keflavík tapar dugir FH-ingum sigur í Árbænum.

Fylkir hefur verið í fallbaráttu í sumar rétt eins og 1989, sem var fyrsta tímabil Fylkismanna í efstu deild. En nú hafa þeir bjargað sér frá falli og hafa því upp á ekkert að spila á morgun nema stoltið.

Það má einnig taka fram að árið 1989 féll Keflavík með Fylkismönnum í aðra deild. Staða þeirra er þó allt önnur nú.