Palestínskum flóttamönnum boðið hæli á Íslandi

Ríkisstjórn Íslands samþykkti á fundi sínum í morgun tillögu flóttamannanefndar um að bjóða allt að 30 manna hópi palestínskra flóttamanna hæli á Íslandi. Þetta kemur fram í tilkynningu frá félagsmálaráðuneytinu.

Um er að ræða konur, einstæðar mæður og börn þeirra sem nú dvelja við afar bágar aðstæður í Al Waleed flóttamannabúðunum í Írak. Konurnar hafa flestar misst eiginmenn sína í stríðsátökum undanfarinn ára og eru taldar líklegar til að geta nýtt sér tækifæri til nýs lífs í íslensku samfélagi.

Þá segir að flóttamannastofnun Sameinuðu þjóðanna hafi veitt hópnum stöðu flóttamanna og nú tekur við ferli hér heima sem felist í því að kanna nákvæmlega aðstæður þeirra einstaklinga sem um ræðir. Að lokum mun sendinefnd með fulltrúum flóttamannanefndar og fulltrúa Útlendingastofnunar fara til flóttamannabúðanna í Al Waleed og taka viðtöl við hælisleitendur. Akraneskaupstaður hefur nú til umfjöllunar erindi frá flóttamannanefnd um að taka á móti hópnum, líklega síðar í sumar.

„Í upplýsingum Flóttamannastofnunar Sameinuðu þjóðanna koma fram lýsingar á skelfilegum aðstæðum í flóttamannabúðunum í Al Waleed. Hitastig á svæðinu getur sveiflast frá frosti upp í fimmtíu gráður á celsíus. Fólkið býr í tjöldum við afar slæman aðbúnað, þjónusta á staðnum er afar bágborin. Til að fá læknisþjónustu þarf að ferðast um 400 kílómetra leið í leigubíl því enginn aðgangur er að sjúkrabílum. Flóttafólkinu stafar hætta af snákum og rottum, börnum af stöðugum ferðum flutningabíla og íbúum öllum stafar hætta af því að eldur brjótist út í tjaldbúðunum," segir í tilkynningu félagsmálaráðuneytisins.