Margrét: Ólaf vantar einhvern til að borga herkostnaðinn

Ólafur F. Magnússon, fráfarandi borgarstjóri, sem hefur ákveðið að ganga til liðs við Frjálslynda flokksins á nýjan leik gerir það þar sem hann vantar fjárhagslegan stuðning fyrir næstu kosningar, að mati Margrétar Sverrisdóttur, fyrsta varaborgarfulltrúa F-lista og óháðra.

,,Ólaf bráðvantar einhvern til að borga herkostnaðinn fyrir næstu kosningabaráttu ef hún verður. Þetta lyktar svolítið af tækifærimennsku og eiginhagsmunum sem mér finnst hann hafa í fyrirrúmi, blessaður," segir Margrét.

Ólafur boðaði til blaðamannafundar Ráðhúsinu í morgun þar sem hann tilkynnti að hann hygðist ganga í Frjálslynda flokkinn og bjóða fram undir merkjum hans í næstu kosningum. Ólafur sagðist hafa rætt við Guðjón Arnar Kristjánsson, formann flokksins, sem styður ákvörðun Ólafs. Jóni Magnússyni, þingmanni flokksins, þykir ekki mikið koma til ákvörðunarinnar.

Það kemur Margréti ekki á óvart að móttökurnar séu ekkert alltof góðar enda Frjálslyndi flokkurinn sundurleitur flokkur, að hennar mati. ,,Annars þarf ekki að spyrja mig sérstaklega um hans gjörðir þar sem mér er nokk sama hvað hann er að sprikla," segir Margrét og hlær.

,,Ef hann væri að fylgja hugsjónum sínum þar sem umhverfismálin eru víst efst á baugi þá er nú Frjálslyndi flokkurinn ekki hlýjasti faðmurinn enda sveigist flokkurinn heldur sterkt til stóriðjustefnu," segir Margrét að lokum.