Alikálfi ekki slátrað þótt Ólafur gangi í flokkinn

Jón Magnússon, formaður Frjálslynda flokksins í Reykjavík, segir að innganga Ólafs F. Magnússonar í Frjálslynda flokkinn verði ekki meðhöndluð með neinum öðrum hætti en venjulega. „Af hverju ætti svo að vera? Maðurinn studdi ekki flokkinn við síðustu kosningar og hefur ekki gert það hingað til," útskýrir Jón.

Ólafur gekk úr Sjálfstæðisflokknum árið 2001 og ári seinna bauð hann fram í borginni undir merkjum Frjálslyndra og óháðra (F-listi). Nú stígur Ólafur skrefið til fulls en í dag tilkynnti hann á blaðamannafundi að hann hygðist ganga í Frjálslynda flokkinn og bjóða fram undir merkjum hans í næstu kosningum.

„Þegar glataði sonurinn kom heim, þá var slátrað alikálfi, en ég sé ekki nokkra ástæðu til að slátra alikálfi yfir þessum fregnum," segir Jón.

Jón telur það gjörsamlega fráleitt ef Ólafur ætlast til þess að geta gengið inn í flokkinn og sjálfkrafa leitt hann í næstu borgarstjórnarkosningum. Jón undrast framgöngu Ólafs. „Er þetta ekki bara í samræmi við manninn yfir höfuð?" spyr Jón og hlær.