Lögreglan reynir að tryggja öryggi fólks

„Menn hafa allar heimildir til þess að safnast saman og mótmæla en við verðum að tryggja að þeir valdi ekki töfum á umferð og tryggja öryggi fólks," segir Hörður Jóhannesson yfirlögregluþjónn hjá lögreglunni á höfuðborgarsvæðinu um aðgerðir lögreglu gegn vörubílstjórum á Suðurlandsvegi fyrir stundu.

Lögreglan beitti piparúða og kylfum á þá sem ekki fóru eftir tilmælum lögreglu.

Hörður segir að hingað til hafi vörubílstjórar farið á brott þegar lögregla hefur mætt á svæðið en núna hafi menn ekki hlýtt tilmælum lögreglu.

„Því var gripið til þessara aðgerða en þeir hafa reynt að gera lögregluna að einhverjum andstæðingi sínum sem er ekki rétt. Lögreglan er bara að vinna sitt verk með því að tryggja öryggi."

Nokkrir voru handteknir og færðir á lögreglustöð að sögn Harðar. „Þetta gengur út á það að ef menn vilja ekki færa bílana verðum við að gera það. Við ræðum síðan við þessa aðila en síðan er þeim bara sleppt."

Sjúkraliðar voru á vettvangi og var það lögreglan sem kallaði þá til. „Það var af öryggisástæðum og þeir skoluðu gasið úr augum fólks. Þetta er ekki hættulegt en óþægilegt, enda á það að vera óþægilegt," segir Hörður.

Aðspurður segir Hörður að lögreglan muni bregðast við með svipuðum hætti ef menn fari ekki eftir tilmælum. „Hvert tilvik er auðvitað metið fyrir sig en hingað til höfum við sýnt þolinmæði og það hefur gengið vel. En þegar stefnir í að það eigi ekki að virða okkar fyrirmæli þá verðum við að beita þeim úrræðum sem við höfum."