Íslendingi hótað með hnífi á Sunny Beach

Vísir sagði frá því fyrr í vikunni að dönsk ungmenni myndu enn flykkjast í svall á sumardvalarstaðinn Sunny Beach í Búlgaríu. Ströndin sem gengur undir nafninu Nauðgunarströndin í norrænum fjölmiðlum er annáluð fyrir ofbeldi og nauðganir. Þrátt fyrir þetta orðspor virðist aðsóknin ekki fara minnkandi. Íslenskir útskriftarnemar dvöldu þar árið 2006

Í umræddri frétt Vísis fengust þær upplýsingar frá Sambandi íslenskra framhaldsskólanema að ekki væri vitað til þess að íslenskir nemar hefðu farið í útskriftarferð til Sunny Beach.

Við nánari eftirgrennslan kom hinsvegar í ljós að a.mk. þrír framhaldsskólar fóru í útskriftarferð til Sunny Beach árið 2006. Menntaskólinn við Sund, Menntaskólinn í Kópavogi og Verzlunarskóli Íslands sendu útskriftarnema til Búlgaríu.

Verzlunarskólanemar lentu í nokkrum hremmingum á staðnum og var meðal annars ráðist á stelpur úr hópnum auk þess sem ein þeirra var skorin á höndum og í andliti.

Sigurður Svansson fór með Menntaskólanum við Sund í ágúst 2006 og segir ferðina hafa verið mjög fína. „Það er hinsvegar rétt það sem kemur fram í þessari frétt, að þetta er stórhættulegt place," segir Sigurður sem nú stundar nám við Háskóla Íslands.

Sigurður varð sjálfur fyrir leiðinlegri reynslu þegar hann gekk ásamt nokkrum félögum eftir aðalgötu Sunny Beach. Þá mætti hann manni sem var með slöngur, krókódíla og myndavél um hálsinn.

„Skyndilega hendir hann slöngu utan um hálsinn á mér sem ég tók ekkert alltof vel í og neitaði síðan að borga fyrir myndina. Þá tók hann bara upp rýting, setti hann upp við magann á mér og sagðist stinga mig ef ég myndi ekki borga," segir Sigurður sem var peningalaus.

„Félagi minn hljóp þá út í hraðbanka og náði í peninga og ég borgaði honum. Þetta var sko á aðalgötunni og fullt af fólki í kring."

Fyrir utan þessa uppákomu segir Sigurður að Sunny Beach sé algjört „partýplace" sem er troðfullt af skemmtistöðum og strippbúllum.

„Okkur var sagt í upphafi ferðarinnar að vera ekkert að fara niður á strönd þegar það væri orðið dimmt. Það kom samt fyrir að einhverjir fóru og einn strákur lenti þá í manni með kylfur sem var að reyna að selja honum dóp. Ég vissi samt ekki að þetta væri svona slæmt," segir Sigurður og vitnar í fyrrnefnda grein Vísis.