Opinn fjárfestingarsjóður fjármagnar verkefni REI

Stjórn Orkuveitur Reykjavíkur samþykkti einróma á fundi sínum í dag þá ákvörðun stjórnar Reykjavík Energy Invest að stofna opin fjárfestingarsjóð til þess að fjármagna verkefni REI.

Í tilkynningu frá Orkuveitunni segir að stjórn REI hafi í gær samþykkt tillögu um að kanna möguleika á því að ganga til samstarfs við fagaðila um stofnun opins fjárfestingasjóðs sem hafi með höndum fjármögnun verkefna félagsins.

„Áður en til stofnunar sjóðs komi, verði sérstakri ráðgjafanefnd falið að gera tillögu um nánari útfærslu og aðferðafræði við val samstarfsaðila. Ráðgjafanefndin taki þegar til starfa og skili áliti innan tveggja vikna. Stjórnin mun jafnframt hefja vinnu við að útfæra samningsmarkmið REI gagnvart væntanlegum viðsemjanda, láta verðmeta framlag REI/Orkuveitu Reykjavíkur (OR) til væntanlegs samstarfs og taka afstöðu til þess hvaða verkefni REI er hugsanlegt að verði fjármögnuð af sjóðnum. Niðurstöður þessarar vinnu verði bornar undir stjórn OR," segir í tilkynningunni.

Verði af stofnun fjárfestingarsjóðs á að bera samkomulagið undir stjórn Orkuveitunnar og eftir atvikum eigendafund ef það felur í sér breytingu frá áður markaðri stefnu eigenda um málefni REI.

Í tilkynningu Orkuveitunnar segir enn fremur að stjórn REI hafi á undanförnum mánuðum unnið að stefnumótun fyrirtækisins og skoðað hvernig verkefnum þess verði best fyrir komið til framtíðar. Sú vinna hefur sérstaklega tekið mið af niðurstöðu stýrihóps borgarráðs um málefni REI og Orkuveitu Reykjavíkur, þar sem áhersla var lögð á þverpólitíska samstöðu, farsæla niðurstöðu og sátt um fyrirtækið.

Eftir að hafa ráðfært sig við sérfræðinga hjá Price Waterhouse Coopers varð það niðurstaðan að stofna fjárfestingarsjóð til að tryggja fjármögnun verkefna félagsins. „Markmiðið með stofnun sjóðsins er að hámarka afrakstur af orðspori og þekkingu OR og lágmarka fjárhagslega áhættu eigenda REI. Stefnt er að því að sjóðurinn verði opinn öllum fjárfestum á jafnréttisgrundvelli. Gert er ráð fyrir að starfsemi sjóðsins verði takmörkuð landfræðilega og í tíma og að stofnun hans útiloki ekki aðrar fjármögnunarleiðir," segir í tilkynningunni.