Einstaklega björt minning um Sigurbjörn Einarsson

Pétur Sigurgeirsson biskup segir að minning sín um Sigurbjörn Einarsson biskup sé alveg sérstaklega góð og björt.

„Hann vígði mig sem vígslubiskup á Hólum árið 1969 að mig minnir. Það var mikil athöfn sem ég gleymi ekki," segir Pétur. Hann segist jafnframt minnast þess hlýlega þegar Sigurbjörn lét af embætti.

„Þegar ég var kosinn biskup á eftir honum þá gleymi ég ekki hversu vel og fallega hann tók á móti mér þegar ég kom hingað til Reykjavíkur og undirbjó þá athöfn með sérstökum hætti." Pétur segir að Sigurbjörn hafi gert þá athöfn mjög minnisstæða fyrir sig og eiginkonu sína.

„Þess minntist ég æ síðan hvað hann tók vel á móti okkur," segir Pétur. Hann segir að Sigurbjörn og Magnea eiginkona hans hafi ávallt verið miklir vinir þeirra hjóna.