Staðfestir fimm ára dóm vegna hrottafenginnar nauðgunar

Hæstiréttur staðfesti í dag fimm ára fangelsi yfir tveimur Litháum vegna hrottalegrar nauðgunar sem átti sér stað í miðbæ Reykjavíkur í fyrra. Þá voru þeir dæmdir til þess að greiða fórnarlambi sínu saman 1,2 milljónir króna í bætur sem er átta hundruð þúsund krónum minni upphæð en Héraðsdómur Reykjavíkur hafði tilgreint.

Litháarnir Arunas Bartkus, 32 ára, og Rolandas Jancevicius, 28 ára, voru ákærðir fyrir að hafa báðir nauðgað konu aðfaranótt 10. nóvember síðastliðinn í húsasundi við Laugaveg eða Vitastíg í Reykjavík. Þá beittu þeir hana harkalegu ofbeldi, neyddu hana til munnmaka og mátti sjá verulega áverka á henni þegar hún leitaði til Neyðarmóttöku nauðgana.

Héraðsdómur taldi öll gögn í málinu sýna að atburðurinnn hefði átt sér stað og vitnisburður konunnar væri trúverðugur þrátt fyrir sakarneitun annars þeirra. Undir þetta tók Hæstiréttur. Frá dómnum dregst gæsluvarðhald frá 12. nóvember.