Hélt dóttur sinni nauðugri í sex ár og nauðgaði

Pólsk kona hefur staðfest frásögn dóttur sinnar um að faðir hennar hafi haldið henni fanginni í sex ár, nauðgað henni reglulega og eignast með henni tvö börn.

Mæðgurnar leituðu loks til lögreglunnar í síðustu viku og hefur faðirinn verið handtekinn.

Dóttirin er nú tuttugu og eins árs gömul. Mæðgurnar sögðu lögreglunni að þegar hún var fjórtán ára gömul hafi faðir hennar lokað hana inn í herbergi þar sem enginn húnn var innan á hurðinni.

Hann fór svo til hennar og nauðgaði henni þegar hann vildi með þeim afleiðingum að hún eignaðist tvö sveinbörn.

Faðir hennar fór með henni á sjúkrahús þegar hún eignaðist þau og neyddi hana til þess að gefa synina til ættleiðingar.

Lögreglan leitar nú drengjana til þess að sannreyna faðerni þeirra. Talsmaður lögreglunnar segir að málið sé skammt á veg komið. Mörgum spurningum sé ósvarað.

Hann vildi ekki gefa neina skýringu á því af hverju mæðgurnar leituðu ekki fyrr til lögreglunnar. Hann sagði að erfitt væri að yfirheyra konurnar þar sem þær væru í miklu tilfinningalegu uppnámi.