Karzai: Múslímar verða að berjast gegn öfgastefnu

Hamid Karzai, forseti Afganistans, segir hópa manna misnota íslam til þess að myrða og slasa fólk og vill að múslímalönd berjist saman gegn öfgastefnu.

Þetta kom fram í máli hans á efnahagsráðstefnu íslamskra ríkja í Kúveitborg í dag. Karzai var sýnt banatilræði um helgina í Kabúl en þar voru á ferðinni uppreisnarmenn talibana. Þrír létust í árásinni og tíu særðust en forsetinn slapp ómeiddur.

Á ráðstefnunni í dag sagði Karzai: „Það er óvinur á meðal vor. Sumir misnota nafn trúar okkar og kalla yfir okkur eymd og eyðingu í stað þess að öðlast víðsýni. Við verðum að berjast gegn óvininum sem er öfgastefna en hún kemur í veg fyrir þróun landa okkar, kastar rýrð á ímynd okkar og rústar lífi okkar," sagði Karzai.