Tveir handteknir vegna innbrota á Bolungarvík

Lögregla á Vestfjörðum handtók á fimmtudaginn tvo menn vegna gruns um aðild að innbrotum í fjölmargar bifreiðar og íbúðarhús í Bolungarvík aðfaranótt fimmtudagsins.

Fram kom í tilkynningu lögreglunnar í síðustu viku að farið hefði verið inn í sex bifreiðar og þaðan ýmsum verðmætum stolið og skemmdir unnar á hluta bílanna. Þá fóru menn inn í tvö hús þessa nótt en hlupu á bortt þegar húsráðendur urðu þeirra varir.

Í dagbók lögreglunnar á Vestfjörðum í dag kemur fram að tveir menn hafi verið handteknir vegna málsins en þeim hefur nú verið sleppt. Hluti þýfisins er fundinn en lögreglan vinnur áfram að rannsókn málsins.