Rooney með tvö í sigri Englands

England er komið í ansi góða stöðu í sínum riðli í undankeppni HM 2010 eftir 3-1 sigur á Hvít-Rússum á útivelli í kvöld.

Wayne Rooney skoraði tvívegis í leiknum eftir að Steven Gerrard hafði komið þeim ensku yfir strax í upphafi leiksins.

Úrslitin þýða að England er með fullt hús stiga eftir fjóra leiki og með fimm stiga forystu á Króatíu, sem einnig hefur spilað fjóra leiki, og Úkraínu sem hefur aðeins leikið þrjá.

Staðan í hálfleik var 1-1 en Sitko hafði jafnað metin fyrir heimamenn á 28. mínútu. Rooney skoraði svo tvö mörk í síðari hálfleik.

Gerrard skoraði sitt mark með glæsilegu langskoti en fyrr mark Rooney kom eftir fyrirgjöf frá Emile Heskey og það síðara eftir undirbúning Gerrard.