Íslendingar fremja líka glæpi

Margrét Steinarsdóttir, lögfræðingur Alþjóðahúss, segir að varast beri alhæfingar um erlenda ríkisborgara eins og Íslendinga í heild sinni.

Í skýrslu greiningardeildar Ríkislögreglustjóra sem kom út í gær segir að austur-evrópskir ríkisborgarar séu fluttir inn til landsins til að fremja afbrot.

Margrét segir lágt hlutfall Íslendinga fremja afbrot og það sama eigi við um erlenda ríkisborgara. ,,Það er alltaf ákveðinn hópur sem fremur glæpi en það á ætíð að fara varlega í að dæma allan hópinn."

,,Börn frá ákveðnum löndum í Austur-Evrópu verða fyrir aðkasti og einelti í skólum út af þessari umræðu og það þykir okkur afskaplega leiðinlegt og erfitt," segir Margrét og bætir við að fáir afbrotamenn af erlendum uppruna leiti til Alþjóðahússins.