Pálmi segir Stöð 2 ekki beita blekkingum

„Það er rétt sem Sigríður sjónvarpsstjóri á SkjáEinum segir að allar sjónvarpsstöðvar bæta við sig áhorfi í rafrænum mælingum líkt og kemur fram í umræddri grein," segir Pálmi Guðmundsson, sjónvarpsstjóri Stöðvar 2. Sigríður Margrét Oddsdóttir, framkvæmdastjóri Skjá miðla ehf. gerði í dag athugasemd við viðtal við Pálma í Fréttablaðinu í morgun þar sem sagði að SkjárEinn væri að skilja sig frá hinum stöðvunum tveimur með mun lægra áhorf en áður.

Sigríður sagði þetta ekki rétt, SkjárEinn hefði aukið áhorf sitt um 34% frá könnun síðasta árs. Hún sagðist velta því fyrir sér hvort það vekti fyrir Stöð 2 að blekkja bæði auglýsendur og fjárfesta með tali af þessu tagi.

Pálmi segir bilið milli stöðvanna hinsvegar breikka. „Við erum að taka stærri sneið af kökunni," segir Pálmi. „Vikulegt áhorf 12 - 80 ára í mínútum sýnir að Stöð 2 er með 97% meira áhorf en SkjárEinn og munurinn á milli stöðvanna hefur ekki verið meiri um langt árabil. Áskrifendur Stöðvar 2 verja nálægt 80% af sínum áhorfstíma á Stöð 2 sem er ekkert annað en stuðningsyfirlýsing við dagskrá okkar. Það eru engar blekkingar, þessari upplýsingar er allar að finna til að mynda á Capacent.is"