Móðir í forræðisdeilu fékk símtal frá grátandi syni

Sigríður R. Kristjánsdóttir stendur í forræðisdeilu við Jeff Ramsey, bandarískan barnsföður sinn, um tvö börn þeirra. Jeff fékk börnin í heimsókn fyrir mánuði og neitar að skila þeim jafnvel þótt Sigríður hafi pappíra sem sanni að börnin skuli búa hjá henni á Íslandi.

Hringdi og sagði að börnin kæmu ekki heim

Sigríður var gift bandaríska listamanninum Jeff Ramsey en í byrjun árs gekk skilnaður þeirra í gegn. Tvö börn þeirra, Reginn tíu ára og Sölva átta ára, hafa verið í heimsókn hjá föður sínum undanfarinn mánuð og áttu þau að fljúga aftur heim í fyrrakvöld. Síðastliðinn sunnudag hringdi Jeff hins vegar í Sigríði og tjáði henni að börnin myndu ekki koma heim á tilsettum tíma.

Sonurinn, með asperger og einhverfu, þolir illa aðstæðurnar

Samkvæmt Sigríði er skýrt kveðið á um í skilnaðarsamningunum að hún og Jeff skuli hafa sameiginlegt forræði yfir börnunum en að þau skuli búa hérlendis hjá móður sinni. „Ekki það að ég sé mótfallin því að börnin séu hjá föður sínum en ég og börnin fluttum aftur til Íslands í desember og það er mikilvægt fyrir þau að vera ekki á of miklu flakki. Sérstaklega sonur minn sem er bæði með asperger og er einhverfur, hann ræður ekki við svona miklar breytingar. Hann verður að vera heima hjá sér," útskýrir Sigríðir og bætir við að Reginn hafi til dæmis hringt til hennar grátandi og sagt vilja heim.

Hvetur fólk til að senda barnsföðurnum tölvupóst

Sigríður hefur leitað stuðnings hjá utanríkisráðuneytinu, barnaverndarstofu og íslenska sendiráðinu í Washington. Segir hún að allir aðilar sem hún hafi rætt við sýni henni fullan stuðning og telji hana í rétti. Þegar Vísir hafði samband við utanríkisráðuneytið neitaði fulltrúi ráðuneytisins að veita upplýsingar um málið enda er starfsmönnum óheimilað að tala við fjölmiðla um slík mál.

Vísir hafði einnig samband við Jeff Ramsey, föður barnanna, og vildi hann ekki tjá sig um málið en sagði að lögfræðingur sinn myndi hafa samband.

Sjálf íhugar Sigríður að fljúga vestur um haf til þess að heimta aftur börnin tvö. Hún hefur einnig hrint af stað sérstakri herferð þar sem fólk er hvatt til að sýna henni stuðning með því að senda undirskrift sína til barnsföður hennar.