Ábendingar til Samkeppniseftirlitsins fimmfaldast milli ára

Fjöldi þeirra ábendinga sem Samkeppniseftirlitinu bárust frá almenningi og fyrirtækjum fimmfaldaðist á milli áranna 2006 og 2007. Þetta kemur fram í ársskýrslu eftirlitsins sem kynnt var í dag. Alls bárust 150 ábendingar í fyrra, flestar um nýja gátt á heimasíðu stofnunarinnar, en ábendingarnar voru 30 árið 2006.

Í skýrslunni segir einnig að langflestar ábendingar hafi varðað neyslu- og rekstrarvörur, einkum matvörumarkað, fjarskipti og fjölmiðlun, samgöngur ogferðamál.

Þá kemur fram í skýrslunni að málum í meðferð í fyrra hafi fjölgað miðað við fyrri ár, en þau reyndust 136. Á árinu lauk 117 málum, þar af lauk um 70 málum með ákvörðun á heimasíðu. Hér eru einungis talin stjórnsýslumál sem lúta með einum eða öðrum hætti að atvikum í atvinnulífinu. Þá framkvæmdi Samkeppniseftirlitið framkvæmdi óvenjumargar húsleitir á árinu. Þannig var ráðist í sex húsleitaraðgerðir hjá um 15 fyrirtækjum vegna fimm stjórnsýsluathugana.

Enn fremur hefur skilvirkni stofnunarinnar aukist á undanförnum árum. Segir í skýrslunni að þrátt fyrir að málum hafi fjölgað og umfang aukist hafi tekist að stytta meðallengd málsmeðferðar talsvert. Miðgildi málsmeðferðartíma sýnir enn fremur að helmingi mála lauk á innan við þremur mánuðum eftir að mál hófst.

Aldurssamsetning mála hefur einnig breyst mikið til batnaðar. Þannig eru 70 prósent mála sem til meðferðar voru í byrjun árs 2007 yngri en eins árs, samanborið við 52 prósent árinu áður. Um 11 prósent mála voru nú eldri en tveggja ára, samanborið við 27 prósent árinu áður.