Mátti ekki mynda undirskrift

Ljósmyndaranum Gunnari V. Andréssyni var meinað að mynda þegar skrifað var undir viljayfirlýsingu ríkisstjórnarinnar, Alcoa og Norðurþings í Iðnaðarráðuneytinu í morgunn.

Gunnar er einn reyndasti fréttaljósmyndari landsins og þótti uppákoman miður skemmtileg. ,,Við fengum að mynda þegar þeir voru að koma fram eftir að skrifað var undir. Mér finnst þetta mjög merkilegt og furðuleg ákvörðun hjá Össuri sem forðast vanalega ekki kastljós fjölmiðlanna."

Vísir ræddi við Einar Karl Haraldsson, aðstoðarmann Össurar Skarphéðinssonar iðnaðarráðherra, sem brást ókvæða við þegar hann var spurður út í málið.

,,Hvaða andskotans máli skiptir einhver undirskrift," sagði hann hvassyrtur - ekki hafi verið verið boðað til blaðamannafundar vegna undirskriftarinnar. ,,Einhverjir fjölmiðlar fengu veður af þessu og Fréttablaðið bað í gær um að fá að mynda undirskriftina."

Spurður hvert svarið hefði verið við bón Fréttablaðsins endurtók Einar: "Við boðuðum ekki til blaðamannafundar."

Nýverið gaf Blaðamannafélag Íslands út yfirlýsingu þar sem Þórunn Sveinbjarnardóttir umhverfisráðherra var harðlega gagnrýnd fyrir að reyna að ritstýra umfjöllun í seinna ísbjarnarmálinu.

Þórunn takmarkaði aðgang fjölmiðla að hræi ísbjarnarins af þeirri ástæðu að myndir gætu skaðað ímynd landsins. ,,Allir tilburðir til þess að takmarka aðgang fjölmiðla að fréttaviðburðum, til dæmis með því að hindra myndatökur, fela í sér tilraunir til ritskoðunar," sagði í ályktun Blaðamannafélags Íslands.