Botnliðin leika Valsmenn grátt

„Þetta er alveg grátlegt. Það er eins og töfluröðin taki okkur alveg úr sambandi. Skagamenn komu hingað til að spila fyrir stoltið í dag og börðust meira og uppskáru eftir því," sagði Willum Þór Þórsson, þjálfari Vals, eftir að liðið tapaði fyrir ÍA á heimavelli sínum í gær.

Valsmenn hafa þrívegis í sumar tapað fyrir neðsta liði deildar­innar og aðeins fengið eitt stig úr viðureignum sínum gegn HK og ÍA. Hlíðarendapiltar náðu sér ekki á strik í gær og var fyrri hálfleikurinn sérstaklega slakur.

„Þetta skánaði í seinni hálfleik og við vorum staðráðnir í því að berjast. Við unnum fleiri návígi og þá fengum við færi sem við nýttum þó ekki," sagði Willum.

Skagamenn höfðu yfirhöndina í fyrri hálfleik og komust yfir strax á þriðju mínútu þegar Arnar Gunnlaugsson sýndi hvað hann kann og skoraði frábært mark. Hann og Bjarki fengu sitt dauðafærið hvor fyrir hálfleik til að koma ÍA í tveggja marka forystu en það tókst ekki.

Valsmenn voru ekki með í fyrri hálfleiknum og ógnuðu marki ÍA ekki af neinu viti. Þeir léku mun betur í seinni hálfleiknum og vildu í tvígang fá vítaspyrnu en Þorvaldur Árnason dæmdi ekkert við mikla gremju Valsmanna.

Hornspyrnur Vals voru stórhættulegar í seinni hálfleik en ekki fundu þeir leið framhjá Trausta Sigurbjörnssyni sem átti mjög góðan leik í marki ÍA. Fyrir framan Trausta léku varnarmennirnir fjórir allir vel en það hefur ekki gerst oft í sumar.

Von Skagamanna um að bjarga sér frá falli er enn til staðar þótt veik sé. Fimm stig eru upp úr fallsæti fyrir þá gulu.

„Já, reiknimeistararnir verða að segja til um það. Þetta kemur allt í ljós," sagði Kári Steinn Reynisson, sem átti frábæran leik í bakverðinum.

„Það vantaði púður í þá og þeir ógnuðu lítið. Við áttum að vera búnir að gera út um þetta í fyrri hálfleik þegar við fengum dauðafæri til að bæta við. Þeir pressuðu nokkuð mikið í síðari hluta seinni hálfleiks," sagði Kári.

Varðandi framhaldið sagði Kári að það þyrfti bara að taka einn leik fyrir í einu.

„Þetta er ekkert endilega í okkar höndum svo við verðum bara að hugsa um að klára okkar leiki og sjá hverju það skilar,." sagði Kári Steinn að lokum.