Íslendingur á Nyhedsavisen: Starfsmenn komu af fjöllum

Teitur Jónasson, yfirmaður ljósmyndadeildar Nyhedsavisen, segir að allir starfsmenn ritstjórnar blaðsins hafi komið af fjöllum þegar tilkynnt var um að útgáfu blaðsins yrði hætt í gær.

Tilkynningin um að útgáfunni yrði hætt kom í tölvupósti til starfsmanna um klukkutíma eftir að lokið var við að senda síðasta tölublaðið í prent.

„Það höfðu reyndar verið sögusagnir um þetta síðasta föstudag eftir að launin bárust ekki en Morten Lund eigandi sló þær af borðinu. Þetta kom okkur öllum því mjög á óvart," segir Teitur.

Í morgun var svo haldinn fundur með eigendum og starfsmönnum. Morten Lund útskýrði afhverju þessi ákvörðun hefði verið tekin.

„Stemningin á fundinum í morgun var fín. Kannnski soldið tilfinningaþrungin. Morten bað okkur afsökunar á því að þetta væri niðurstaðan. En það er enginn reiður út í hann. Flestir starfsmenn gera sér grein fyrir því að ef hann hefði ekki komið inn í þennan resktur væri löngu búið að taka þessa ákvörðun."

Launamál eru enn í óvissu hjá mörgum starfsmönnum en samkvæmt fréttum hefur Morten Lund ekki gefið nein svör um hvort hann geti staðið við skuldbindingar sínar í þeim málum.

Að öllum líkindum þurfa margir starfsmenn að leita á náðir hins opinbera sem tryggir starfsmenn fyrir skakkaföllum af þessu tagi.

Teitur, sem hlotið hefur verðlaun fyrir ljósmyndun á þeim tíma sem hann hefur verið yfir ljósmyndadeild Nyhedsavisen, segist ekki vera búinn að taka ákvörðun um sín næstu skref.