Stoðir Invest: Með veð í öllum eignum Mortens Lund

Heimildir Vísis herma að Stoðir Invest vonist til að fá eitthvað af þeim fjórum milljörðum sem félagið lánaði Nyhedsavisen í útgáfutíð þess til baka í gegnum veð sem það á í öllum eignum Mortens Lund, stærsta hluthafa blaðsins.

Morten Lund keypti 51% hlut af Dagsbrún Media í Nyhedsavisen í janúar á þessu ári og jók síðan hlutinn í 85% í byrjun júlí. Stoðir Invest voru stærsti hluthafinn í Dagsbrún Media og átti eftir síðustu viðskipti 15% hlut.

Heimildir Vísis herma að Morten Lund hafi lagt fram veð í öllum sínum eignum til að fjármagna kaupin á bréfunum í Nyhedsavisen. Stoðir Invest munu nú, eftir að ljóst er að Nyhedavisen er gjaldþrota, ganga á þessi veð og sjá hversu mikið af þeim fjórum milljörðum sem félagið lánaði Nyhedsavisen það fær til baka.