Verkfall ljósmæðra að veruleika á miðvikudag

Verkfall ljósmæðra verður að veruleika eftir að fundur þeirra með samninganefnd ríkisins í dag reyndist árangurslaus. Fundurinn hófst klukkan tvö og lauk um klukkustund síðar og hefur næsti fundur verið boðaður á fimmtudag. „Við erum því miður í þeim aðstæðum að skipuleggja verkfallsaðgerðir," segir Guðlaug Einarsdóttir, formaður Ljósmæðrafélags Íslands.

Ljósmæður samþykktu í ágúst með yfirgnæfandi stuðningi að boða til verkfallsaðgerða nú í september til að knýja á um betri kjör. Fyrsta verkfallið skellur á á miðnætti á miðvikudag og stendur í tvo sólarhringa. Í kjölfarið taka við stigmagnandi verkföll sem enda í allsherjarverkfalli 29. september ef ekki hefur samist fyrir þann tíma.

Aðgerðirnar koma til með að skerða töluvert þjónustu á fæðingardeildum en Guðlaug segist ekki vita hversu margar ljósmæður leggi niður störf á miðnætti á miðvikudag. Krafa ljósmæðra er sem fyrr að fá menntun sína metna til launa í samræmi við sambærilegar stéttir sem starfa hjá ríkinu.

Deilt er um svokallaða undanþágulista vegna neyðarþjónustu sem eru listar yfir þær ljósmæður sem eru undanþegnar verkföllum. Guðlaug bendir á að listarnir séu 13 ára gamlir en ríkinu beri að uppfæra þá árlega til þess að standa vörð um neyðarþjónustu í landinu þegar stéttarfélög nota sín verkfallsrétt. „Ríkið hefur ekki hirt um að uppfæra lista í 13 ár og þar af leiðandi virt að vettugi þennan rétt stéttarfélaga til að fara í verkfall, störf ljósmæðra og öryggi skjólstæðinga þeirra," segir Guðlaug.

Undanþága nær ekki til meðgöngudeildar og sónardeildar

Samkvæmt túlkun Ljósmæðrafélagsins á undanþágulistunum er engin undanþága í gildi hjá Heilbrigðisstofnun Suðurnesja og Heilsugæslu höfuðborgarsvæðisins. Hins vegar nái undanþága til Heilbrigðisstofnunar Suðurlands, Heilbrigðisstofnunar Austurlands og tveggja sængurkvennadeilda og bráðadeilda á Landspítalanum en ekki til Hreiðursins, meðgöngudeildar og sónardeildar á sama spítala. Þá óskar félagið eftir upplýsingum um hvernig sjúkrahúsin á Akureyri, Ísafirði, Vestmannaeyjum og Akranesi, hyggist nýta undanþágu sína.

Ljósmæðrafélagið leitaði álits Landlæknisembættisins vegna undanþágulistanna og túlkun félagsins á listunum. Var það mat Landlæknisembættisins að mjög brýnt væri að undanþágulistar heilbrigðisstétta endurspegluðu á hverjum tíma þá þörf sem nauðsynlegt væri að uppfylla til að tryggja öryggi sjúklinga. Bendir Landlæknisembættið á að við gerð undanþágulista þurfi ætíð að líta til þróunar í heilbrigðisþjónustunnar sem geti verið afar hröð og því ættu þeir að liggja fyrir á hverju ári.