Mengun ógnar Ólympíuleikunum

Kínverjar þurfa að huga að mörgu fyrir Ólympíuleikana sem hefjast átta mínútur og átta sekúndur yfir átta þann áttunda ágúst 2008.

Hryðjuverkaógn er ein af meginhættunum en loftmengun veldur ekki minna fjaðrafoki. Peking er meðal menguðustu borga heims og með fleiri bílum og vaxandi iðnaði verður ógnin alltaf meiri og meiri.

„Vissulega þá höfum við hugsað um þetta,“ segir Líney Rut Halldórsdóttir framkvæmdastjóri ÍSÍ. „Við erum þó fullvissuð um á öllum þeim fundum sem við höfum verið á að þetta verði ekki vandamál. Þetta snertir íslensku keppendurna raunar ekkert sérstaklega mikið. Allt frjálsíþróttafólkið okkar verður að keppa úti en allir aðrir inni,“ sagði Líney.

Stjórnvöld í Kína eru með áætlun sem hreinlega verður að ganga upp. Þegar Peking óskaði þess að halda leikana árið 2001 lofuðu stjórnvöld því að allt yrði með felldu sjö árum síðar. „Loft og vatn verður innan þeirra hættumarka sem Heilsumálastofnunin (WHO) telur eðlileg í Peking.“ Svo er nú ekki.

„Fulltrúar frá Alþjóða Ólympíunefndinni segja að þetta geti komið þolgreinunum við, ef þeir telja að þetta sé yfir mörkunum þá verður þeim bara frestað eða einfaldlega lagðar af. Til dæmis maraþonið,“ segir Líney.

Stjórnvöld hafa áhyggjur. Mælingar sýna að dagamunur er mismunandi, stundum hefur leyfilegt magn mengunar verið fjórfalt yfir hættumörkum. Sjaldan fór mengunin undir mörkin. Neyðaraðgerðir stjórnvalda hafa þegar verið skipulagðar og fara þær í gang 20. júlí.

Í þeim felst að loka götum í hálfri borginni til að stoppa bílaumferð, stöðva allar framkvæmdir við nýbyggingar og loka fjölda verksmiðja. Meira að segja verður bannað að spreyja utandyra eftir þennan dag. Borgin hefur því nítján daga til að hreinsa sig áður en leikarnir hefjast.

Ef neyðaraðgerðin virkar ekki verður gengið enn lengra. Stjórnvöld hafa þó ekki gefið út nákvæmlega hvað þær aðgerðir fela í sér. Ljóst þykir að ef neyðaraðgerðirnar virka ekki bíða bæði Ólympíuleikarnir og Kína mikla hnekki, sérstaklega ef aflýsa þarf greinum á borð við maraþonið og hjólreiðar. Kínverjar treysta einnig á að fá fleiri rigningardaga nú í júlí sem hjálpar til við að hreinsa loftið í borginni.

Allir keppendur geta fylgst vel með menguninni á sérstökum eftirlitsstöðvum víðsvegar um borgina. „Auk þess verður læknalið frá alþjóða Ólympíunefndinni sem fylgist með mælunum, það verða því ekki bara Kínverjar. Við getum fylgst með mælingunum á hverjum degi,“ sagði Líney.