Furðar sig á orðum utanríkisráðherra

„Það hefur eitthvað breyst síðan kosningaloforðin voru gefin," segir Guðlaug Einarsdóttir, formaður Ljósmæðrafélags Íslands, um yfirlýsingar Ingibjargar Sólrúnar Gísladóttur utanríkisráðherra um að ekki sé hægt að ganga að kröfum ljósmæðra í einum áfanga.

„Það er alveg merkilegt ef fólk sem maður þekkti af því að vera jafnréttissinnað heldur því fram núna að það sé ekki hægt að leiðrétta kjör vegna þess að það sé of stór hlutur," segir Guðlaug. Hún bendir enn fremur á stjórnarsáttmálann sem kveður á um að launamunur kynjanna skuli minnkaður um helming á kjörtímabilinu. „Er það þá það glerþak sem Samfylkingin samþykkir? Er það þeirra trú að kvennastéttum beri ekki að vera á 17 prósentum heldur 8,5 prósentum lægri launum en karlastéttir," segir Guðlaug og vísar þar til nýrrar könnunar SFR á launamun kynjanna. „Þetta er alveg með ólíkindum," bætir hún við.

Guðlaug gagnrýnir enn fremur þau orð utanríkisráðherra að hlutur kvenna verði ekki jafnaður eingöngu með því að setja peninga inn í kjarasamninga því það skili sér ekki allt til kvenna. „Við erum hrein kvennastétt svo ekkert af fjármunum fer til karla þannig að þetta er út í hött hjá utanríkisráðherra," segir Guðlaug.

Aðspurð hvort framganga utanríkisráðherra í málinu hafi valdið henni vonbrigðum segir Guðlaug að hún vilji gefa ráðherra tækifæri „en mér heyrist að það sé of langt frá síðustu kosningum og of langt í næstu kosningar."

Fundur samninganefndar ljósmæðra með samninganefnd ríkisins hófst nú klukkan þrjú. Aðspurð hvort útspil fjármálaráðherra, að stefna ljósmæðrum fyrir félagsdóm vegna meintra ólögmætra uppsagna, hafi áhrif á samningaviðræður segir Guðlaug: „Að sjálfsögðu hefur þetta áhrif enda var það aldrei önnur ætlun hjá fjármálaráðherra með þessu en að reyna að hafa áhrif á viðræðurnar." Guðlaug segir þó ljósmæður fullvissar um að þær hafi réttinn sín megin.