Fundu eftirlýstan stríðsglæpamann með gagnabanka Interpol

Yfirvöld í Frakklandi handtóku fyrir skemmstu karlmann frá Rúanda, Issac Kamali, sem eftirlýstur hefur verið fyrir þjóðarmorð og glæpi gegn mannkyni.

Eftir því sem segir í fréttatilkynningu frá alþjóðalögreglunni Interpol hugðist Kamali fara til Bandaríkjanna á frönsku vegabréfi. Við komuna til Fíladelfíu komust innflytjendayfirvöld í Bandaríkjunum hins vegar að því að Kamali var á lista Interpol yfir eftirlýsta menn vegna þjóðarmorðanna í Rúanda á tíunda áratug síðustu aldar.

Hann var því sendur aftur til Frakklands og handtekinn við komuna á Charles de Gaulle flugvöllinn í París.