Lauslátir Íslendingar

„Já, þetta er leiðinleg þróun og neikvæð. Auðvitað viljum við að barneignir séu innan helgi hjónabandsins. Þannig bera menn virðingu fyrir sjálfum sér, maka sínum og börnum. Já, lauslæti er landlægt á Íslandi,” segir Gunnar Þorsteinsson hjá Krossinum.

Samkvæmt nýjum fréttum frá Hagstofunni fæðast fleiri börn utan hjónabands á Íslandi en í nokkru öðru Evrópuríki. Einungis þriðjungur barna fæðist innan vébanda hjónabands eða 34,4 prósent. Börnum sem fæðast utan skráðrar sambúðar hefur fjölgað hlutfallslega, þau voru um 10,2 prósent allra barna sem fæddust á árabilinu 1991-1995 en eru nú rétt rúm 14 prósent. Þetta lýst Gunnari illa á. En sér þó ljósa punkta.

„Sem betur fer vilja ungar konur eiga börn þó þau komi undir við erfið skilyrði. Frekar en konur í nágrannalöndunum. Það er í sjálfu sér jákvætt. Munurinn á okkur og hinum er fóstureyðingar.”

Og í það les Gunnar að virðingin fyrir lífinu hér sé örlítið meiri. Hér fari konur ekki svo glatt í fóstureyðingar. En auðvitað eigi helgi hjónabandsins að vera í öndvegi. „Helgi hjónabandsins er rammi um barneignir og kynlíf. En hér er mikið af óskilgetnum börnum og mikið af ungum stúlkum sem er að eiga börn. Íslenskir foreldrar og Íslendingar almennt taka óvelkominni þungun betur en viðast hvar. Umburðarlyndari en gengur og gerist? Það má heita svo.”