Árásirnar mögulega áætlaðar 11. september

Varnarmálaráðherra Þýskalands sagði í morgun að yfirvöld hefðu traustar heimildir fyrir því þrír grunaðir hryðjuverkamenn sem voru handteknir í gær hefðu ætlað að láta til skarar skríða fljótlega. Mennirnir eru grunaðir um að hafa ætlað að skipuleggja hryðjuverkaárásir á flugvöllinn í Frankfurt og á herstöð bandaríkjahers í Ramstein.

Í tilkynningu frá ríkissaksóknara Þýskalands sagði að leitað hefði verið á í húsum á nokkrum stöðum í landinu í gær. Í kjölfarið hafi þrír menn verið handteknir, grunaðir um að vera meðlimir í íslömskum hryðjuverkahópi.

Að sögn þýskra fjölmiðla eru tveir hinna grunuðu þýskir ríkisborgarar, en einn er með pakistanskt ríkisfang.

Flugvöllurinn í Frankfurt er einn sá fjölfarnasti í heimi. Herstöðin í Ramstein er í um 130 kílómetra fjarlægð frá vellinum, og er ein mikilvægasta herstöð Bandaríkjamanna utan heimalandsins.

,,Það eru sterkar vísbendingar til þess að Ramstein og Frankfurt-flugvöllur að minnsta kosti hafi verið möguleg skotmörk, og að stutt hafi verið í að mennirnir myndu láta til skarar skríða." sagði stjórnmálamaðurinn Wolfgang Bosbach við þýska sjónvarpsstöð. Hann bætti við að líklegt væri að árásin hefði verið áætluð 11. september, á afmæli árásarinnar á tvíburaturnana.

Fyrr á þessu ári var líbanskur maður kærður fyrir tilraun til sprengjuárásar í Þýskalandi árið 2006. Hann og vitorðsmaður hans skildu tímastilltar sprengjur eftir í tveimur lestum, en þær sprungu aldrei vegna bilunar í tæknibúnaði.

Þýskir hermenn eru meðal herliðs NATO í Afghanistan. Þýsk yfirvöld hafa lengi óttast að öfgahópar sæki í sig veðrið í landinu, en í Hamburg var ein af bækistöðvum hryðjuverkamannanna sem réðust á tvíburaturnana í new york þann 11. september 2001.