Seldi mest allra nýliða af klassískri tónlist í Bretlandi

Enginn nýliði náði betri árangri í sölu á klassískri tónlist í Bretlandi á árinu heldur en Garðar Thór Cortes.

Þetta hefur fengist staðfest hjá The Chart Company, fyrirtækinu sem heldur utan um bresku vinsældalistanna eftir því sem segir í tilkynningu frá Believer, útgefanda Garðars Thórs. Platan hans, Cortes, kom út 16. apríl í Bretlandi og sat í efsta sæti listans í þrjár vikur í apríl og fram í maí. Það var svo Lucinao Pavarotti sem tók toppsætið af Garðari um miðjan maí.

Útgefendur og samstarfsfólk Garðars er fullt bjartsýni og stefnt er að útgáfu annarrar plötu í maí á næsta ári. „Við erum auðvitað hrikalega ánægð með að fá þetta staðfest. Við vissum þetta náttúrulega þar sem við höfum verið að fylgjast stíft með gangi mála á þessum lista allt árið. Það verður tilnefnt til Klassísku Brits verðlaunanna í mars og miðað við þennan árangur þá finnst mér að Garðar eigi tilkall til nýliða ársins," segir Einar Bárðarson, samstarfsmaður Garðars, í tilkynningu til fjölmiðla.