Föt af Britney til sölu á eBay

Britney Spears þénar meira en 700 þúsund dollara á mánuði og ætti það að duga ágætlega fyrir salti í grautinn. Einhverra hluta vegna þarf poppprinsessan þó að selja fötin sín á eBay.

Í síðustu viku setti eBayverslunin ,,I Sold it" grænan hlýrabol og gallabuxur af söngkonunni á uppboð. Hlýrabolurinn þótti í góðu standi, en gallabuxurnar voru með blettum, líklega eftir mat. Heppinn einstaklingur hreppti hnossið fyrir sjö hundruð dollara.

Eigandi búðarinnar, sem selur muni í umboðssölu á eBay, ábyrgist að fötin séu ekta, og segir að aðstoðarmaður söngkonunnar hafi komið með þá.

Það sem er í boði þessa vikuna er vafasamur svartur gegnsær blúndukjóll, sem Britney klæddist ásamt skærbleikum brjóstahaldara í nýlegum verslunarleiðangri. Í dag var hæsta boð í hann 466 dollarar. Í næstu viku æsast leikar, en þá verður boðinn upp rauður kjóll sem söngkonan klæddist þegar myndir náðust af henni nærfatalausri á leið út úr bíl sínum.