Bretar komu, sáu og sigruðu á Emmy

Það er óhætt að segja að Bretar hafi komið séð og sigrað þegar Alþjóðlegu Emmy-verðlaunin voru afhent við hátíðlega athöfn á Hilton hótelinu í New York í gærkvöldi

Breskir sjónvarpsþættir voru tilnefndir til átta emmyverðlauna og hlutu sjö af þeim. Um er að ræða verðlaun fyrir þætti sem gerðir eru utan Bandaríkjanna.

Af þeim sjö sem hlutu verðlaun voru allir nema einn framleiddir af BBC. Það var The Street sem kosin var besta dramatíska þáttaröðin og fékk Jim Broadbent þar að auki verðlaun fyrir bestan leik í aðalhlutverki í þessum þáttum.

Meðal annarra þekktra Breta sem verðlaun hlutu var Stephen Fry í flokki heimildamynda fyrir The Secret Life of the Manic Depressive.

Al Gore fyrrum varaforseti Bandaríkjanna nældi sér í enn ein kvikmyndaverðlaun á hátíðinni en hann hlaut heiðursverðlaun þeirra að þessu sinni.

Frændur okkar Danir eru hinsvegar í sárum eftir kvöldið. Þeir höfðu gert sér töluverðar vonir um að sjónvarpsþættir þeirra, Forbrydelsen, myndi slá the Street við en það varð ekki. Það er danska ríkisútvarpið sem framleiðir þættina og haft er eftir skúffuðum talsmanni útvarpsins að þeir verði bara að gera betur á næsta ári.