Donadoni réð sér ekki af kæti

Roberto Donadoni, landsliðsþjálfari Ítalíu, segir að hann hafi ekki getað haldið aftur af tilfinningum sínum eftir sigur sinna manna í Skotlandi í gær.

Þökk sé marki Christian Panucci í uppbótartíma unnu Ítalir 2-1 sigur á Skotlandi og tryggðu þar með bæði sér og Frökkum sæti í úrslitakeppni EM á næsta ári á kostnað Skota.

Donadoni hefur mátt þola mikla gagnrýni í heimalandi sínu og var talið nær öruggt að hann hefði ekki haldið áfram í starfi hefði hann mistekist að koma sínum mönnum á EM.

„Venjulega kann ég að hafa stjórn á tilfinningum mínum en í þetta skiptið vildi ég óska strákunum til hamingju með árangurinn áður en við kæmum inn í búningsklefann."

Hann sagði einnig að hann vonaðist til að upplifa fleiri stundir sem landsliðsþjálfari eins og þessar. „Ég hef aldrei áður upplifað eins mikla gleði og ég gerði eftir leikinn."