Jón Þorgrímur heldur áfram

Jón Þorgrímur Stefánsson sagði í samtali við Vísi að hann hyggðist spila áfram í Landsbankadeildinni næsta ár en hann hugleiddi um tíma að hætta.

„Jú, ég held það nú alveg örugglega,“ sagði Jón Þorgrímur við Vísi. „Ég vil prófa að spila í tólf liða efstu deild enda hefur það verið draumur allra leikmanna sem spilað hafa í þessari deild undanfarin tuttugu ár.“

Samningur Jóns Þorgríms við HK rennur út núna um áramótin en hann segir þó líklegast að hann spili áfram með liðinu. Hann eigi þó alfarið eftir að skoða sín mál og muni fyrst ræða við HK.

„Ég hef reyndar ekkert rætt við HK-inga enn. Þar að auki hef ég heyrt af áhuga annarra liða en ég mun fyrst skoða mín mál hjá HK. Það var frábært að fara upp um deild með liðinu og halda svo sætinu í Landsbankadeildinni í sumar.“