Guðmundur Benediktsson framlengir samning við Val

„Á meðan maður hefur ennþá gaman af því að spila fótbolta og hefur fína heilsu þá er engin ástæða til að hætta," segir Guðmundur Benediktsson sem hefur framlengt samning sinn við Íslandsmeistara Vals um eitt ár.

Guðmundur er 33 ára gamall. Hann spilaði gríðarlega vel í sumar og voru margir Valsmenn hræddir um að nú myndi hann leggja skóna á hilluna eftir að titlinum var hampað. Guðmundur segist þó ekki hafa íhugað alvarlega að hætta núna. „Ég velti því aðeins fyrir mér en eins og ég segi þá dröslast maður í þessu á meðan maður gerir eitthvað gagn og hefur gaman af."

Miðað við spilamennsku Guðmundar í sumar má ætla að önnur lið deildarinnar hafi viljað klæða hann úr rauðu treyjunni og í einhverja aðra. "Það voru einhverjar þreifingar en ekkert alvarlegt. Það kitlaði líka mest að spila áfram með góðu liði sem ætlar sér að vera gott áfram," segir Guðmundur og nefnir einnig að spennandi verði að leika á nýja Vodafonevellinum næsta sumar. "Það verður gaman að taka þátt í því ævintýri," bætir hann við.

„Ég held það sé bara raunhæft að taka eitt ár í einu, maður veit heldur aldrei hvernig líkaminn verður og því vil ég bara taka eitt ár í einu," segir Guðmundur þegar hann er spurður að því hvort ekki hafi komið til greina að semja til lengri tíma en eins árs.

Guðmundur hefur lent í erfiðum meiðslum á ferli sínum sem knattspyrnumaður en hefur verið nokkuð heppinn síðan hann gekk í Val. „Já ég held ég hafi bara misst úr einn leik í deild og þá var ég í leikbanni. Ég hef því verið blessunarlega laus við meiðsl síðustu ár, sjö, níu, þrettán," segir Guðmundur kampakátur að lokum.