Konur í Hollywood heiðraðar

Sjö konur voru í gær heiðraðar á árlegri samkomu Elle tímaritsins, Women in Hollywood, sem haldin var í Los Angeles. Sex leikkonur og einn leikstjóri hlutu heiðurinn. Aldursforsetinn hin 82 ára Lauren Bacall sagði frábært þegar sjónum væri beint að konum sem væru virkar í starfi. „Ég hef alltaf verið sannfærð um að konur geti komist eins langt og þær vilja." Þær sjö konur sem hlutu heiðurinn að þessu sinni eru:

Leikstjórinn Julie Taymor (Across the Universe) og leikkonurnar Lauren Bacall, Diane Lane (Unfaithful), Kate Bosworth (Superman Returns), Jennifer Connelly (A Beautiful Mind), Amy Adams (Junebug) og Scarlett Johansson (Lost in Translation).

Johansson var spurð að því hvernig hún kæmi sér hjá því að lenda í vandræðum líkt og jafnöldrur hennar í Hollywood, þær Britney Spears, Paris Hilton og Lindsay Lohan. Hún svaraði því til að Hollywood væri ekki endilega svo hættulegur staður heldur væri hegðun þeirra birtingarmynd af samfélaginu í heild.

Konurnar sjö eru allar með að minnsta kosti eina mynd á prjónunum og er Amy Adams væntanleg á hvíta tjaldið í tveimur. Annars vegar í Disneymyndinni Enchanted og hins vegar í hasarmyndinni Charlie Wilson's War með Tom Hanks og Juliu Roberts.

Hér fyrir neðan má sjá heiðurskonurnar sjö: