Valur tapaði fyrir Everton

Valur tapaði í dag fyrir Everton í Evrópukeppni félagsliða. Leikurinn fór fram í Belgíu.

Everton vann leikinn, 3-1. Þau úrslit gætu þó dugað Val því ef Frankfurt vinnur Wezemaal síðar í dag hafnar Valur í öðru sæti riðilsins.

Þar með kemst liðið í fjórðungsúrslit keppninnar þar sem líklegur andstæðingur eru Svíþjóðameistarar Umeå.

„Þetta var heldur betur kaflaskiptur leikur," sagði Elísabet Gunnarsdóttir, þjálfari Vals, í samtali við Vísi eftir leik.

Katrín Jónsdóttir minnkaði muninn eftir að þær ensku komust í 3-0 snemma í síðari hálfleik. „Við áttum leikinn algjörlega eftir það. Við vorum að skjóta í slána og skeytin. En markið sem Katrín skoraði gæti reynst dýrmætt því við værum einfaldlega úr leik ef hún hefði ekki skorað. Nú verðum við að leggjast á bæn að Frankfurt vinni Belgana."

Frankfurt er eitt sterkasta lið Evrópu og býst Elísabet við að þær gefi ekkert eftir. „Þær eru ekki komnar hingað til að tapa leik."