Astrópía valtar yfir Bourne Ultimatum

Aðsókn á kvikmyndina Astrópíu hefur vakið athygli langt út fyrir landsteinana. Fjallað er um málið í nýjasta tölublaði bandaríska kvikmyndablaðsins Screen International. Þar þykir það eftirtektarvert að á sama tíma og aðsókn á stórmyndina Bourne Ultimatum dregst saman hérlendis eykst aðsókn á Astrópíu.

„Við erum að vonum mjög ánægðir með þessa umfjöllun," sagði Ingvar H. Þórðarson, framleiðandi Astrópíu, í samtali við Vísi. „Þetta er fín auglýsing og á eflaust eftir að hjálpa okkur þegar við förum með myndina í dreifingu erlendis. Þessi umfjöllun Screen International hefur einnig vakið athygli hjá Warner Brothers."

Í nýjasta tölublaði bandaríska kvikmyndablaðsins Screen International er fjallað um aðsókn á kvikmyndina Bourne Ultimatium víðs vegar um heim. Í greininni vekur það athygli að aðeins á Íslandi fer myndin ekki í fyrsta sæti heldur þarf að víkja fyrir myndinni Astrópíu.

Fyrstu viku frá frumsýningu féll aðsókn á Bourne Ultimatum um 49 prósent á Íslandi en á sama tíma jókst aðsókn á Astrópíu um eitt prósent. Þá segir ennfremur í greininni að greinilegt sé að Ragnhildur Steinunn Jónsdóttir, aðalleikona Astrópíu, valti yfir leikarann Matt Damon á Íslandi.

Yfir 25 þúsund manns hafa séð Astrópíu frá því myndin var frumsýnd í lok síðasta mánaðar. Ingvar segist búast við því að aðsóknin fari yfir 30 þúsund um helgina. „Við reiknum með að fara yfir 30 þúsund manns um helgina."