12 Kóreumenn lausir úr prísund sinni

Talíbanar í Afganistan hafa nú sleppt 12 af þeim 19 Suður-Kóreumönnum sem þeir hafa haft í gíslingu undanfarnar vikur. Gíslunum var sleppt lausum í þremur hópum á mismunandi tímum í dag. 10 konum og tveimur mönnum hefur verið sleppt.

Talsmenn talíbana segja að gíslunum sjö sem enn eru í haldi verði sleppt bráðlega. Fólkinu, sem eru kristniboðar, hefur verið haldið í gíslingu síðan í júlí. Lausn málsins má rekja til samkomulags sem Suður-Kórea gerði við talíbana í gær. Samkomulagið gerir ráð fyrir því að hermenn frá Suður Kóreu verði sendir heim fyrir árslok eins og ráð hafði verið fyrir gert, öllu krisniboðastarfi í landinu verði tafarlaust hætt og borgurum Suður-Kóreu verði bannað að ferðast til Afganistan.

Á fréttavef BBC er greint frá því að ekki hafi verið tekið fram hvort lausnargjald hafi verið greitt en heimildir BBC herma að svo gæti hafa verið. Svo virðist sem talíbanar hafi fallið frá upphaflegu kröfu sinni sem var sú að félögum þeirra í afgönskum fangelsum yrði sleppt.

Upphaflega var 23 gíslum rænt, tveir voru teknir af lífi og tveimur konum var sleppt fyrir nokkru.