Voffi erfir mest

Hóteldrottningin og milljarðamæringurinn Leona Helmsley - betur þekkt sem ,,the Queen of Mean" - sem lést í síðustu viku, ánafnaði hundinum sínum 12 milljónum Bandaríkjadala. Þá sagði í erfðaskrá hennar að hundurinn skildi jarðarður við hlið hennar og eiginmannsins í fimm stjörnu lúxus-grafhvelfingu þeirra.

Helmsley var meðal annars þekkt fyrir að hafa látið hafa það eftir sér að það væri bara fátæka fólkið sem borgaði skatt, þegar hún var á leið í fangelsi fyrir að svíkja undan skatti.

Hundurinn, agnarsmár hvítur Maltese að nafni Trouble, fær meira en nokkur afkomandi Helmsleys, en alls lætur hún eftir sig fjóra milljarða Bandaríkjadala. Þar af skiptast 50 milljónir dollara milli Trouble og afkomenda hennar, en stærstur hluti auðæfanna verður settur í góðgerðarsjóð í nafni hennar og eiginmannsins.

Tvö barnabörn Helmsley fá ekki grænan eyri, og í erfðaskránni segir að þau viti fullvel af hverju það er. Þau eru tvö af fjórum börnum eina sonar Helmsley, sem lést árið 1982. Systkyni þeirra fá hinsvegar fimm milljónir dala hvert, en það er háð því að þau heimsæki gröf föður síns einu sinni á ári hið minnsta.

Helmsley var 87 ára þegar hún lést. Viðurnefnið öðlaðist hún fyrir að þykja sérlega dónaleg.