Forsvarsmenn Parken vilja 80 milljónir í bætur

Danska fótboltabullan sem hljóp inn á völlinn í leik Dana og Svía í júní síðastliðinn og sló til dómara leiksins á yfir höfði sér 80 milljóna króna sekt. Það er rekstraraðili Parken leikvangsins sem fer fram á skaðabæturnar.

„Við ætlum með málið alla leið," segir framkvæmdastjóri Parken, Flemming Östergard í samtali við dönsku fréttastöðina TV2 News. Skaðabótunum er meðal annars ætlað að dekka tapið sem Parken varð fyrir þegar Danska landsliðinu var bannað að leika heimaleiki sína á Parken í kjölfar uppákomunnar.

Knattspyrnusamnband Danmerkur hyggst einnig sækjast eftir skaðabótum á hendur manninum en ekki hefur fengist uppgefið hve há sú krafa verður.

Hin 29 ára knattspyrnubulla á að mæta fyrir rétt í Kaupmannahöfn á fimmtudaginn kemur þar sem mál hans verður tekið fyrir.