Lögregla á Indlandi uppvís að hrottaskap

Lögreglumenn á Indlandi börðu grunaðan þjóf, bundu hann við mótorhjól og drógu hann eftir götunni. Þetta sést á myndbandi sem kom fram í dag.

Maðurinn reyndi að stela hálsfesti en náðist og nærstaddir hófu að berja hann óþyrmilega. En þegar lögregla skarst í leikinn var það ekki til að bjarga manninum heldur til að bæta um betur.

Á myndbandinu má sjá að lögreglumenn bundu hendur hans og gengu jafnvel harðar fram en aðrir. Þjófnaðir eru algengir í Bihar fylki á Indlandi og almenningur hefur litla samúð með afbrotamönnum.

Aðfarir lögreglu gegn þeim - einkum fátækum stéttleysingjum sem stela sér til viðurværis - eru alræmdar. Ekki er þó vitað til þess að hrottaskapurinn hafi fyrr verið festur á filmu og ráðamönnum er nóg boðið. Lögreglumaður sem sást á myndbandinu hefur verið látinn víkja úr starfi á meðan málið er rannsakað.

Konan sem stolið var af fékk hálsfestina aftur en hinn meinti þjófur var færður á sjúkrahús, illa haldinn.