Slæður umdeildar í Tyrklandi

Abdullah Gul var í dag kjörinn forseti Tyrklands, í atkvæðagreiðslu á tyrkneska þinginu. Gul var áður framarlega í flokki íslamista í Tyrklandi, en hann hefur heitið því að styðja áframhaldandi aðskilnað ríkis og trúar í landinu.

Sem utanríkisráðherra hefur hann verið einarður talsmaður aðildar Tyrklands að Evrópusambandinu. Kjör Abdulla Gul sem forseta vekur upp ákafar spurningar um samband ríkis og mosku í Tyrklandi, spurningar sem kristallast í stöðu eiginkonu hins nýja forseta.

Eiginkonuna, Harinisu Gul, var hins vegar hvergi að sjá þegar eiginmaður hennar tók við embættinu. Hún sést ekki öðruvísi en með slæðu, en þær hafa verið illa séðar allar götur síðan Ataturk stofnaði tyrkneska lýðveldið á millistríðsárunum.

Á götum úti má sjá konur með slæður en þær mega ekki vera með slæðu í háskóla, ekki í störfum á vegum ríkisins og ein missti ríkisborgararéttinn eftir að láta sjá sig með slæðu á tyrkneska þinginu.

Yfirmenn hersins sögðust í gær vera reiðubúnir að berjast gegn "illum öflum", en yfirmenn hersins líta á sig sem útvörð þess fyrirkomulags að trúin sé málefni einstaklingsins sem eigi hvergi heima á opinberum vettvangi. Sjálfur segist Abdullah Gul engar fyrirætlanir hafa um að breyta því.