Norskir diplómatar sendir heim frá Eþíópíu

Eþíópísk stjórnvöld hafa vísað sex norskum sendiráðsstarfsmönnum af níu úr landi, en þau saka Norðmenn um að reyna að kynda undir ófriði á austurodda Afríku.

Tilraunir Norðmanna til að koma á samningaviðræðum milli Eþíópíu og Erítreu um landamæri þeirra, eru líklega ástæðan fyrir ummælunum, að sögn norskra fjölmiðla. Löndin háðu blóðuga landamæradeilu á árunum 1998 til 2000 þar sem 70 þúsund manns létu lífið. Spenna magnast nú á ný á milli þeirra á ný.

Í yfirlýsingu sem norski utanríkisráðherran, Jonas Gahr Stoere gaf í gær sagðist hann harma einhliða ákvörðun Eþíópíumanna. Með svo mikilli fækkun í starfsliði sendiráðsins ætti það erfitt með að sinna þróunarverkefnum sínum í landinu.

Noregur gefur mest allra þjóða til þróunarmála. Landið hefur verið ötult við að miðla málum í ófriði og borgar landið meðal annars fyrir friðargæslul í löndum eins og Súdan, Bosníu, Sri Lanka og Kólumbíu. Þeir eru alls ekki óvanir því að vera sakaðir um hlutdrægni af stríðandi aðilum.