Fjölþjóðalið berst við skógarelda í Grikklandi

Slökkviliðsmenn frá sautján löndum berjast nú við skógareldana í Grikklandi við hlið grískra starfsbræðra sinna. Eldar kvikna hraðar en slökkviliðsmönnum tekst að kveða þá niður.

Slökkviliðsmenn á átján flugvélum og jafn mörgum þyrlum reyna án afláts að slökkva eldana úr lofti. Fjórar þyrlur frá Sviss og 55 slökkviliðsmenn frá Ísrael eru í fjölþjóðaliðinu sem nú hefur hafið störf í Grikklandi.

Vitað er um 64 menn sem hafa látið lífið í þessum mestu skógareldum sem sögur fara af í landinu. Á síðasta sólarhring kviknuðu 56 eldar á ýmsum stöðum. Hlutfallið milli elda sem kvikna og elda sem slökktir eru er ekki slökkviliðsmönnum í hag.

Stjórnvöld hafa fyrirskipað rýmingu margra þorpa á hættusvæðum en fjöldi þorpsbúa neitar að yfirgefa heimili sín. Í ófáum tilfellum koma björgunarmenn að mönnum sem berjast við eldana við heimili sín, þó að þeir eigi að vera löngu farnir burt.

Mikil reiði ríkir í garð stjórnvalda, sem þykja hafa brugðist seint við. Almennar kosningar eru sextánda september og gert er ráð fyrir að eldarnir - og viðbrögðin við þeim - verði hitamálið fyrir þessar kosningar.