Bush segir ófrægingarherferð hafa hrakið Gonzales úr embætti

George Bush Bandaríkjaforseti sagði í dag að blóðþyrstir demókratar á bandaríska þinginu hefðu hrakið dómsmálaráðherrann Alberto Gonzales úr starfi sínu. Gonzales og Bush eru vinir og samstarfsmenn til margra ára. Bush lýsti í dag yfir miklum vonbrigðum með að Gonzales skuli hafa sagt af sér eftir tvö og hálft ár í starfi.

„Eftir að hafa sætt ósanngjarnri meðferð í marga mánuði sem hefur bitnað á starfsumhverfi ráðuneytisins, ákvað Gonzales að segja af sér og ég virði þá ákvörðun," sagði forsetinn í dag áður en hann hélt til Nýju Mexíkó. „Það er dapurlegt að við skulum lifa á tímum þar sem komið er í veg fyrir að heiðvirður maður eins og Gonzales geti unnið að mikilvægum málum vegna þess að hanns góða nafn hefur verið dregið niður í drullusvað af pólitískum ástæðum."

Gonzales hefur legið undir miklum ámæli í langan tíma, nú síðast þegar hann rak átta saksóknara, en gagnrýnendur hans sögðu að pólítískar ástæður hefðu legið þar að baki.