Heiðruðu minningu Rhys Jones

Tveimur ungum mönnum sem grunaðir eru um að hafa skotið Rhys Jones, ellefu ára pilt, til bana í Liverpool í síðustu viku hefur verið sleppt úr haldi gegn tryggingu. Liðsmenn knattspyrnuliðsins Everton, uppháhaldsliðs drengsins, heiðruðu minningu hans í dag.

Hettuklæddur unglingur á hjóli skaut Rhys þar sem hann var að ganga heim af knattspyrnuæfingu á miðvikudagskvöldið í síðustu viku. Lögreglan handtók sex ungmenni vegna málsins. Fjórum var sleppt úr haldi án ákæru en tveimur, sextán og nítján ára pilt, var sleppt gegn tryggingu.

Rhys Jones var skotinn í hálsinn þegar hann var á heimleið eftir að hafa verið að spila fótbolta með vinum sínum á bílastæði í Liverpool. Rhys var mikill aðdáandi knattspyrnuliðsins Everton og heimsóttu leikmenn liðsins vettvang morðsins í dag til að votta honum virðingu sína.