Tvö hundruð manna afmælisveisla fyrir eins árs dóttur Önnu Nicole Smith

Þegar er farið að skipuleggja eins árs afmælisveislu Dannielynn Hope Marshall Birkhead dóttur Önnu Nicole Smith en hún fagnar fyrst afmælisdegi sínum í næsta mánuði.

Tricia Barnstable Brown skipuleggur veisluna sem haldin verður á heimili hennar í Louisville, en þaðan er Larry Birkhead faðir Danielynn. Brown á von á 200 gestum í veisluna og þar á meðal Howard K. Stern sem lengi hélt því fram að hann væri faðir stúlkunnar. Í vor leiddi DNA-rannsókn hins vegar í ljós að Birkhead væri líffræðilegur faðir hennar.

Brown lofar glæsilegri veislu og segir að von sé á íburðamiklum skreytingum og gasblöðrum.

Dannielynn fæddist á Bahamas 7. september 2006. Móðir hennar lést 8. febrúar 2007 eftir ofneyslu fíkniefna.