Fangelsaðir fyrir að stofna stjórnmálaflokk

Áfrýjunardómstóll í Vietnam mildaði í dag dóma yfir þrem mönnum sem voru sakaðir um að hafa dreift óhróðri um ríkisstjórnina og stofnað pólitískan flokk. Mennirnir höfðu verið dæmdir í fimm ára, fjögurra ára og þriggja ára fangelsi. Eitt ár var tekið af hverjum dómi.

Kommúnistaflokkurinn er sá eini sem leyfður er í Vitenam. Þetta eru fjórðu réttarhöldin í landinu á þessu ári yfir fólki sem vill leyfa fleiri stjórnmálaflokka. Samkvæmt lögum í Vietnam flokkast það undir glæpsamlegt athæfi að halda fram skoðunum sem ríkisstjórnin telur í andstöðu við stefnu stjórnvalda og kommúnistaflokksins.