Vonast til að ná sambandi við námuverkamenn

Björgunarmenn sem vinna nú hörðum höndum að því að bjarga námuverkamönnum sem hafa verið fastir í námugöngum í Utah í Bandaríkjunum síðan á mánudag. Verið er að bora holu niður á þann stað þar sem talið er að mennirnir séu og búist er við því að borinn ljúki verki sínu á næstu klukkutímum.

Holan sem verið er að bora er aðeins um tíu sentímetrar í þvermál en í gegnum hana ætla björgunarmenn að koma lofti, drykkjarvatni og næringu til mannana sex sem innilokaðir eru. Enn er þó alls óvíst hvort þeir séu á lífi en sé það raunin mun aðgerðin lengja frestinn sem björgunarmenn hafa til að brjótast niður til þeirra. Ennfremur verður reynt að koma myndavélabúnaði og hljóðnemum niður um holuna.